चण्डीरहस्य (नीलकण्ठ दीक्षितविरचितम्) | Chandirahasya by Nilakanthadikshita

श्रीचण्डीरहस्यम् 
यच्छक्तिलेशसकृदर्पणपात्रभाव-
     मात्रादपि द्रुहिणशौरिमहेश्वराणाम् ।
प्राप्तो यदि श्रुतिशतैः परमात्मभाव-
     स्तामम्ब देवि भवती किमिति स्तुवन्तु ॥ १॥

कृत्वा मुखं पशुपतिर्भवती किलैकां
     निर्माति पालयति हन्ति जगन्ति देवः ।
तज्जामिताविपरिवृत्तिकृते तमेव
     शम्भुं मुखं कृतवती भवतीति मन्ये ॥ २॥

विश्वं नियच्छति विश‍ृङ्खलचेष्टितो यः
     सोऽपि त्वया नियमनीय इति स्फुटं नः ।
वैवस्वतं चिकुरभावजुषं यदम्ब
     बध्नासि वेणिकबरीग्रथनादिभेदैः ॥ ३॥

…