अनुभूतसिद्धसारस्वतस्तवः | Anubhuta Siddha Sarasvata Stavah

अनुभूतसिद्धसारस्वतस्तवः 

कलमरालविहङ्गमवाहना सितदुकूलविभूषणलेपना ।
प्रणतभूमिरुहामृतसारिणी प्रवरदेहविभाभरधारिणी ॥ १॥

अमृतपूर्णकमण्डलुधारिणी त्रिदशदानवमानवसेविता ।
भगवती परमैव सरस्वती मम पुनातु सदा नयनाम्बुजम् ॥ २॥

जिनपतिप्रथिताखिलवाङ्मयी गणधराननमण्डपनर्तकी ।
गुरुमुखाम्बुजखेलनहंसिका विजयते जगति श्रुतदेवता ॥ ३॥

अमृतदीधितिबिम्बसमाननां त्रिजगतीजननिर्मितमाननाम् ।
नवरसामृतवीचिसरस्वतीं प्रमुदितः प्रणमामि सरस्वतीम् ॥ ४॥

विततकेतकपत्रविलोचने विहितसंसृतिदुःकृतमोचने ।
धवलपक्षविहङ्गमलाञ्छिते जय सरस्वति पूरितवाञ्छिते ॥ ५॥

भवदनुग्रहलेशतरङ्गितास्तदुचितं प्रवदन्ति विपश्चितः ।
नृपसभासु यतः कमलाबलाकुचकलाललनानि वितन्वते ॥ ६॥

गतधना अपि हि त्वदनुग्रहात् कलितकोमलवाक्यसुधोर्मयः…